Rom 3 | KMU | STEP | Yuta veaꞋmoꞋya hanaꞋa huꞋya Yuta vea omainaya veala amakase-mainaya veaꞋne mainae? Amaugafa laga hu yamoꞋa na kanale ya amamine?

Romans 3

Kefo yamoꞋa kanale kavala oꞋagasegahie.

1 Yuta veaꞋmoꞋya hanaꞋa huꞋya Yuta vea omainaya veala amakase-mainaya veaꞋne mainae? Amaugafa laga hu yamoꞋa na kanale ya amamine? 2 Tamage Yuta veaꞋmoꞋya kanale yana kasagoꞋya alimainae. Hagoteno Anumaya KotiꞋa humainea kema kae-malenaya kea amayapi malene. 3 Maleneanagi nagoꞋa veaꞋmoꞋya haviꞋya amakupi maleꞋya amametiti ohunaya yateti Anumaya KotiꞋa “Hulokiya vaimalenoa yana mukiꞋa veaꞋmogamina oꞋamamigahue.” huno hugahifi? 4 AꞋao aniꞋa ohugahie. MukiꞋa veaꞋmoꞋya havigeꞋage veaꞋne mainesayana Anumaya KotiꞋa tamageꞋage kano maine. Anumaya Koti avopina mage huꞋya kae-malenayane

“Anumaya Kotiga humalenana kemoꞋa ‘Fatago kano mainane.’ huno hugatene. Kaiyekema hugateleꞋasina amakasateꞋasine.” huꞋya kae-malenayane.
5 Tagaiti kefo yatimoꞋma Anumayamo fatago auꞋava kavaꞋma avelisigeta naꞋane hugahune? Anumaya KotiꞋa kefo kava humainona yateti anonaꞋa haima neꞋvaiya yamaꞋa lamiana “Fatago ohia kava nehie.” huta hisuno? Nani kea ohisune. MukiꞋa veaꞋmoꞋya nehaya ke nehue. 6 Fatago ohunea kavala nohie. Fatago kavaꞋma ohisiana hanaꞋa huno ma mopale veaꞋmogatina kaiyekea hulategahie?

7 Nagaya havigema nehua yateti Anumaya Koti kelamagemo auꞋava yana amave-lisigeꞋya agima alisaga hisayana naꞋa hinageno Anumaya KotiꞋa nagaifena “Kefo kava nehana kano mainane.” huno hunenate? 8 NaꞋama hisiana “Kanale yama falote hisia yafena kefo ya higetao.” huta hisuno. AꞋao, nagoꞋa veaꞋmoꞋya havige huꞋya nagaife “Mani kea humaine.” huꞋya haviꞋya haviya-hunatenae. Mani kema humainaya veaꞋmogamina Anumaya KotiꞋa kaiyeke humateteno haima neꞋvaiya yana amamigahie.

Nagola fatago kanoa omaitafa huno omaine.

9 NaꞋane hisune? Tagaya Yuta veaꞋmogata nagoꞋa veala ago amakase-mainono? AꞋao, tamage huꞋna tamahapauve tagaya mukiꞋa veala Yuta veaꞋnene Yuta vea omainaya veaꞋnene kefo kava nehuna yamo alino aikagilatene. 10 Anumaya Koti autaꞋmafina mage huꞋya kae-malenayane

“Fatago kanoa omaitafa huno omaine. 11 Nago kanomoꞋa Anumaya Kotina aepaꞋa ohavine. Nago kanomoꞋa Anumaya Kotifena atia noꞋaye. 12 Ago ataleꞋya kefo kavakeꞋya humainaya veakeꞋya mainagi nagokela fatago kanoa omaitafa huno omaine. 13 Amavayafitila vaya komufitiꞋma hia kava huno hiꞋmanaꞋage nehie. AmavefuꞋnamoꞋa havigeꞋage nehuno ani amavaya aguꞋafinaga osifaꞋvemoꞋa vayaꞋma amahaegeꞋya nefaliya augafa tina anifinaga hane. 14 Kamuge vai yaꞋene atuꞋage ke neꞋvaiya yaꞋene amavayafina havate-maine. 15 AmaiyayeꞋya veala hamaesageꞋya falisaya yategageꞋya age nemalae. 16 MukiꞋa vea aliꞋya haviya nehuꞋya havi no maisaya yamaꞋage neꞋamamiye. 17 Amaipa falu huꞋya nagoke amaku amakesale akave malesaya yafena nohamaiye. 18 Anumaya Kotifena amamaꞋyoa aiꞋya kolia nohae.” huꞋya kae-malenayane.
19 Tagaya havunagenoꞋa Anumaya Koti kahegi kemoꞋa ani kahegi kemo aiyafi mainaya veaꞋmogamife humaine. Ani yafe nago kanomoꞋa “Nagaya kanale huꞋna fatago kano mainoe.” huno ohisie. NaꞋafenomagi mukiꞋa ma mopale veaꞋmogata Anumaya Koti aulagafina kefo kavakeꞋya nehuna veaꞋne mainonafe kaiyekea hulateno anonaꞋa tamigahie. 20 Anumaya Koti kema akave malenea yateti Anumaya KotiꞋa nago kanomofena “Fatago kano mainane.” huno hu oꞋategahie. Kahegi kemoꞋa nagoke yamaꞋage tavenelie. “Kefo kava nehae.” huno tavenelie.

Kalaisifema havino agupi malenesia kanomofena Anumaya KotiꞋa “Fatago kano mainane.” huno hutegahie.

21 Menia Anumaya Koti aulagafina fatago veaꞋne maisuna yana ago tahapaigeta nehavune. Kahegi kema akave malenaya yateti ani yana falote ohunegi alu kateti falote humaineanagino MoseseꞋene Anumaya Koti amaune vayaꞋmoꞋyaene kae-malenaya kemoꞋa anima kanale ya huta fatago kavaꞋma hisunafe tahapaimainae. 22 Anima fatago huta maisuna kavala maꞋa humaine, nago kanomoꞋa Yisasi Kalaisi hulatenea yafe havino agupi maleno ametiti humainesia yateti Anumaya KotiꞋa “Fatago kano mainane.” huno hutene. Alu kana omalene. 23 MukiꞋa veaꞋmogata kefo kavaꞋageꞋya nehunanagita Anumaya Kotina haisia kava hisuna tokiyatia kosa he-otateneanagita ikapinaga ohaigahune. 24 Ohaigahunagi kefo yatimoꞋa tagaila aikagilateneanagi Yisasi KalaisiꞋa tagaila lavayu hisia miyana atalesiafene huno me faligeno Anumaya KotiꞋa agaiꞋa kayone yamaꞋaleti “Fatago veaꞋne mainae.” huno hulatene. 25 Tagaya kefo yama huna yafena Anumaya KotiꞋa aipa haviya hulateno vea amaulagafi “Yisasiga faligane.” huno hutegeno me falitegeno kolamaꞋamoꞋa elavi-mainea yafema havita tagupi maleta tametiti hunageno Anumaya KotiꞋa aigetateno kefo yatia atalelatene. Anumaya KotiꞋa nayona kefo yama humainaya veala amakata aisia yana anonaꞋamia aupaꞋa oꞋamaminegi Yisasi Kalaisina hutegeno me falimainea yateti Anumaya KotiꞋa agaiꞋa fatago kavaꞋma hia yana taveli-maine. 26 Menia ma mopafi mainona kanafina agaiꞋa fatago kavakeꞋyama nehia yana tavelisiafe Yisasina hutegeno me fali-maineafe mukiꞋa YisasiꞋma hulatenea yafema haviꞋya amakupi maleꞋya amametiti humainaya veaꞋmoꞋya kefo kavala humainayanagi Anumaya KotiꞋa “Fatago veaꞋne mainae.” huno huneꞋamate.

27 NaꞋa humainegi tagaiti lagima alisaga hisuna kaana hanate hane? Omaletafa huno omalene. MukiꞋa kahegi kema akave nemalona yateti tagia alisaga hisuno? AꞋao, tagaiti kanale kava huna yateti Anumaya KotiꞋa “Fatago veaꞋne mainae.” huno huotatenegi YisasiꞋa hulatenea yafe havita tagupi maleta tametiti huna yateti hunelate. Ani lagima alisaga hisuna kaana omalene. 28 Tagaya mage nehune YisasiꞋa hulatenea yafe havita lagupi maleta tametiti humainona yateti Anumaya KotiꞋa “Fatago veaꞋne mainae.” huno hulategahie huta nehune. Kahegi kema akave malesuna yateti hu otategahigi YisasiꞋa hulatenea yafema havita tagupi malona yatetikeꞋya ani kea hulategahie. 29 HanaꞋa humaine? Anumaya KotiꞋa Yuta veaꞋmogami Anumaya KotikeꞋya maineo? Ifi Yuta vea omainaya veaꞋmogamiꞋene Anumaya KotiꞋami maineo? AꞋao, mukiꞋa veala Yuta veaꞋnene Yuta vea omainaya veaꞋnene Anumaya KotiꞋa AnumayaꞋami maine. 30 Anumaya KotiꞋa nagoke agaiꞋage maineafe Yuta veaꞋmoꞋya YisasiꞋma hulatenea yafema haviꞋya amakupi maleꞋya amametiti humainaya yateti Anumaya KotiꞋa “Fatago veaꞋne mainae.” huno humateno Yuta vea omainaya veaꞋnene YisasiꞋa hulatenea yafema haviꞋya amakupi maleꞋya amametiti humainaya yateti Anumaya KotiꞋa “Fatago veaꞋne mainae.” huno humatene. 31 Ani kea ago humainonafe Yisasife havita lagupi malenona yateti “Anumaya Koti kahegi kemoꞋa afa ya kana ke hane.” huta nehuno? AꞋao naꞋa ohutafa humainonagi kahegi kemona ali hetita ali lokiya neꞋvaune.